يكش تولع !!!!

الرسالة وصلت إلى مشرفي صفحة مؤيدي البرادعي عبر البريد الإلكتروني من شاب مصري يحب وطنه .. ندعوكم لقراءتها وإرسالها لجميع من تعرفون

للانضمام لصفحة مؤيدي البرادعي: https://www.facebook.com/elbarad3i

أنا شاب مصري عندي 29 سنة .. من ساعة ما وعيت على الدنيا وأنا شايف حال بلدنا كل سنة بيزيد سوء، كأي شاب مصري تقليدي اتربيت على قراءة الأهرام طول الأسبوع ولما بيجي يوم السبت لازم أشتري أخبار اليوم، كنت باتفرج على القناة التانية بالليل وبمفوتش الشعراوي يوم الجمعة، باشجع النادي الأهلي وباعتبره أهم حاجة منتمي ليها في حياتي.

أما علاقتي بالسياسة فهي علاقة كل شاب مصري بيها .. لخَصناها في جملتين: "خلينا ماشيين جنب الحيط" ... و"البلد دي مفيهاش أمل" ... ياكش تولع!





الإنترنت كان ليها تأثير كبير على حياتي .. لأني بدأت أقرا .. وبدأت اتفاعل مع ناس مش مصريين ..
وبسبب الانترنت ابتديت أسافر دول كتير من غير ما اتحرك من على الكمبيوتر بتاعي .. وابتديت أحس بمدى التأخر والانحدار اللي احنا فيه مقارنة بالدول الاخرى ..
لما اسمع أن اسرائيل عملت براءات اختراع في سنة واحدة .. تعادل كل براءات الاختراع اللي عملها العرب كلهم في خمسين سنة ..
او لما اسمع ان ماليزيا في عشرين سنة قدرت تفرض نفسها كقوة اقتصادية على العالم .. وغيره الكتير !
بلدنا مشاكلها بتزيد كل يوم .. بقينا عاملين زي ناس جالها سرطان بس الدكتور مخبي عنهم الحقيقة .. وعمال يديهم مهدئ عشان الاحساس بالألم يقل ..

كنت دايما باسال نفسي ايه سبب المشاكل اللي احنا فيها والناس اتغيرت ليه؟
بقينا في مقدمة الدول في العالم بس للاسف في معدلات الفقر والفساد والرشاوي .. الشخص النضيف في البلد دي بيعاني علشان يقدر يعيش نضيف ..
وللأسف الكتير من الناس اللي كانت شريفة اضطرت بسبب ظروف الحياة انها تغير من مبادئها وتمد ايدها لحقوق مش بتاعتها ..
الأراضي اللي ملك الدولة اللي بتتباع بأسعار رخص التراب وخلال شهور بيبيعها المستثمرين بمئات الملايين ..
غياب دور التعليم .. وانحدار الخدمات الصحية .. وانهيار المنظمة الاخلاقية ...
الفقر .. والناس اللي مش بتقبض أكتر من 300 جنيه في الشهر .. وبتحارب علشان رغيف عيش وأنبوبة بوتوجاز ...
وكيلو اللحمة اللي أصبح حلم يصعب المنال عند ناس كتير ...
بقى أقصى طموحاتنا كمصريين هو التاهل لكاس العالم .. وبقينا مبنرفعش علم مصر الا يوم الماتش ..

بجد يا جماعة.. المشاكل دي كلها سببها هو أنا وانت مش أي حد تاني ..
السبب هو سلبيتنا كلنا .. اننا قررنا اتباع سياسة: "ياكش تولع" ..
نسينا فكرة أننا كلنا لو اتحدنا عشان نحقق العدل والكرامة والإنسانية ... البلد دي هتتغير ...
مصر عمرها ما هتتغير بالريموت كنترول .. والحال عمره ما هيتحسن طول ما احنا مش بنتحرك ومش بنعمل اللي علينا تجاه بلدنا وولادنا ..

الإنترنت ادتنا فرصة كبيرة جدا اننا نتجمع ونتبادل الافكار والاراء بدون اي وصاية من اي حد كان بيضحك علينا من خلال وسائل اعلام موجهة للضحك على الناس ..
النهاردة بقينا نتكلم مع بعض ونتفق ونختلف ونتعلم حاجات كتير متعلمنهاش في مدارسنا ..
بقى فيه 150 الف شخص ممكن يساندوا شخص زي محمد البرادعي .. لأنه جه بدعوة كلنا كمصريين محتاجينها ..

الفرصة دلوقتي في ايدينا .. عندنا مجموعة من الشرفاء المصريين اللي رفعوا شعار التغيير ومنهم الدكتور محمد البرادعي .. وبيطالبونا نعمل أبسط حاجة .. نطالب بحقوقنا ..
أنا وقعت على بيان التغيير .. وباحاول اقنع كل الناس اللي اعرفها انها توقع عليه ..
مصر مش هينقذها منقذ أو مخلص .. مصر احنا اللي هننقذها ..

المطالب واضحة وسهلة:

- كفاية قانون الطوارئ اللي بيحبس حريتنا وبيدي للسلطة حق اعتقال أي شخص بدون وجود أدنى درجات المحاكمة العادلة

- مش عايزين رئيس لمصر تاني يقعد في الحكم مدى الحياة .. عايزين نبقى زي كل دول العالم المحترمة اللي قدرت تتقدم .. لأن الشخص الجديد دايما بييجي معاه فكر جديد .. وبيتعمد على راي الشعب وخبرة الناس لأنه عارف انه موظف عندهم .. رئيس بلدنا اللي جاي لازم يدي الفرصة لغيره .. ولازم يكون عارف انه بيخدم بلده مش بيملكها ..

- أي حد من حقه يترشح انه يبقى رئيس جمهورية .. ممكن نحط شروط تضمن العلم والكفاءة والمقدرة العقلية والصحية .. بس مينفعش نحط قوانين متفصلة تقرر مين يدخل ومين ميدخلش علشان يفضل حزب معين ومجموعة معينة هي وولادهم يمسكوا الحكم في مصر ...

- عايزين أي مصري يبقى من حقه يمارس حقوقه السياسية .. عايزين المصري يبقى عنده كرامة .. وحرية ... عايزينه يتعامل بعدل .. عايزين نقضي على الواسطة .. والفساد .. والرشاوي .. كل الناس تتحاسب طبقا لقانون مش هيفرق بين واحد والتاني عشان الفلوس ولا الشهرة ولا السلطة ..

يللا نغير مصر للأفضل ...
وبكره الحلم هيبقى حقيقة ...

للتوقيع على بيان التغيير: http://www.taghyeer.net/

مصري بيحب مصر